Kaffistofa Samhjálpar

Kaffistofa Samhjálpar er í Borgartúni 1a (gengið inn frá Guðrúnartúni) og er opin alla daga ársins frá kl. 10-14.

Kaffistofa Samhjálpar

Opið alla daga ársins frá kl. 10-14

Starfsemi Kaffistofunnar er ætluð þeim sem eru í neyð og hafa ekki tök á að sjá sér fyrir mat sjálfir. Athugið að Kaffistofa Samhjálpar er eingöngu fyrir þá sem náð hafa 18 ára aldri og ekki viðeigandi að börn komi hingað inn. Í Kaffistofu Samhjálpar sækir meðal annars fólk sem neytir áfengis- og fíkniefna auk fólks sem glímir við andleg og líkamleg veikindi af ýmsum toga. 

Á Kaffistofu Samhjálpar er alltaf heitt á könnunni. Gestum býðst morgunkaffi ásamt meðlæti strax við opnun. Heit máltíð er framreidd um hádegisbilið og er heitur matur á boðstólum fram að lokun.

Á hátíðis- og tillidögum er hátíðarmatur í boði á Kaffistofu Samhjálpar.

Um 67 þúsund máltíðir eru gefnar á Kaffistofunni á hverju ári.

Kaffistofa Samhjálpar var opnuð árið 1983 en hafði þá bækistöðvar við Hverfisgötu í Reykjavík. Seinna fluttist Kaffistofan í Borgartúnið þar sem hún hefur verið um árabil.

Það er sífelld aðsókn á Kaffistofu Samhjálpar og margir sem þurfa á hjálp að halda. Aðsóknin hefur aukist og þörfin sjaldan verið meiri.

Til okkar leitar umkomulaust og fátækt fólk, ýmist vegna andlegra eða líkamlegra veikinda eða félagslegrar einangrunar. Öll eiga þau það sameiginlegt að búa við fjárhagslegar áskoranir ásamt því sem margir upplifa félagslega útskúfun.

Það er okkur hjá Samhjálp mikill heiður að geta gefið gestum Kaffistofunnar að borða á hverjum degi – allan ársins hring. Þetta getum við gert með hjálp fjölda einstaklinga og fyrirtækja sem styrkja starfið í hverjum mánuði með fjárframlagi og matargjöfum. Fyrir þetta erum við afar þakklát. Kaffistofan hlýtur auk þess árlegan styrk frá Reykjavíkurborg.

Vertu velkomin/n